Dajç
Dajç
Dajçi ndodhet në pjesën jugperëndimore të qytetit të Shkodrës, në një distancë rrugore prej 22 km larg qendrës. Kjo zonë ka një shtrirje prej 36.52 km2 dhe thuajse e gjithë kjo sipërfaqe është tokë bujqësore me vlera të mira prodhuese.
Zona e Dajçit e cila ndodhet përgjatë bregut të majtë të lumit Buna, 10 km poshtë urës së saj, disponon burime natyrore, ujore e mjedisore të konsiderueshme.Përveç traditës për shfrytëzimin e kulturave bujqësore, pemëve frutore, së fundmi ka lindur një traditë e re, ajo e kultivimit të bimëve dekorative.
Elementët e trashëgimisë natyrore dhe kulturore si: Kisha e Shirqit(mes shek.XI-XII), Ura e vjetër e Katalinës(Fshati Darragjat), Shkalla e Belinit(Fshati Belaj), Bregica(pikë turistike e shtrirë buzë lumit Buna), janë një atraksion mëvete.
Kisha e Shirqit, përbën një nga vlerat më të mëdha historike dhe kulturore të vendit tonë.
Një anë muri dhe një gur i gjatë janë gjithçka që ka mbetur nga kisha, ndërkohë historianët pohojnë se kisha ka qenë vendi i preferuar i princërve malazezë e shqiptarë, kryesisht për martesat e tyre.
Vlerat turistike të zonës rriten sepse aty ekzistojnë edhe tradita të artizanatit siç është endja me tezgjah e pëlhurave. Kuzhina e Dajçit është e pasur me receta të mrekullueshme të përshtatura me produktet e freskëta të çdo stine.
Lundrim me kanoe, xhiro me bicikleta përgjatë lumit Buna, peshkim, vrojtim i shpendëve, vizita e objekteve pjesë e trashëgimisë kulturore, janë aktivitetet e ndryshme që mund të zhvillohen në këtë zonë.